Па выніках таргоў замежнымі валютамі 31 траўня на Беларускай валютна-фондавай біржы курс даляра павялічыўся на 38 рублёў (у параўнанні з пятніцай, 27 траўня) і склаў 4970 рублёў. Курс расійскага рубля павялічыўся на 0,3 рубля і склаў 177,62 беларускага рубля за адзін расійскі, курс еўра вырас на 53 рублі і склаў 7159 рублёў.
У адносінах да валютнага кошыка курс беларускага рубля знізіўся на 0,26%. Кошт кошыка на 1 чэрвеня склаў 1848,87 рубля.
З пачатку года курс беларускага рубля да валютнага кошыка знізіўся на 75,3%, да даляра — на 65,67%, да расійскага рубля — на 80,43%, да еўра — на 80,22%.
У сваю чаргу банкі амаль не гандлююць далярамі і еўра. Па словах топ-мэнэджара аднаго з беларускіх банкаў, які пажадаў застацца невядомым, валютны рынак у краіне — як наяўны, так і безнаяўны — мёртвы, паведамляе «Камсамольская праўда ў Беларусі».
«Насельніцтва як не магло вольна купіць валюту ў абменніках, так і не можа гэтага зрабіць. Мала хто хоча здаваць валюту, таму што ведае: побач, на чорным рынку, даляр купяць па 5800-6000 рублёў (курс у абменніку — 5030 рублёў за даляр на панядзелак, 30 траўня)», — сказаў ён.
Але, па словах банкіраў, сітуацыя на пазабіржавым рынку (там, дзе купляюць валюту прадпрыемствы) яшчэ больш няпростая.
«Экспарцёры, якія зарабляюць валюту, не спяшаюцца яе здаваць. Праз рост курсу яны сталі атрымліваць больш рублёў пасля абавязковага продажу часткі сваёй выручкі на біржы (прадаваць трэба 30%.), Гэтага ім хапае на выплату заробкаў і іншыя патрэбы, — кажуць у іншым банку. — Угоды цяпер у асноўным здзяйсняюць толькі тыя экспарцёры, якім патрэбна сыравіна, камплектуючыя для сваёй вытворчасці. Яны прадаюць валюту сваім пастаўшчыкам. Тыя нешматлікія ўгоды, якія праходзяць цяпер у банках, ідуць па курсе Нацбанка +2%».
Гаворачы аб тым, якім можа быць курс, калі адменяць двухпрацэнтнае абмежаванне, банкіры сказалі: «Курс ў выпадку зняцця абмежаванняў будзе залежаць ад тае колькасці рублёў, якія назапасіліся ў кампаній, і патрэбаў, якія на той момант складуцца. Камусьці трэба разлічыцца з пастаўшчыкамі, камусьці — пагашаць валютныя крэдыты. Чым большы будзе попыт, тым вышэй можа быць і курс. Але пасля таго, як гэты попыт будзе задаволены, не выключана, што курс даляра пачне зніжацца».
