Еўракамісар па энергетыцы Гюнтэр Отынгер абмеркаваў сітуацыю з транзітам газу праз беларускую тэрыторыю з міністрам энергетыкі РФ Сяргеем Шматко і віцэ-прэм'ерам Беларусі Уладзімірам Сямашкам. Як заявіў прадстаўнік Еўракамісіі, еўрапейскія спажыўцы "не павінны стаць закладнікам" газавага канфлікту паміж Мінскам і Масквой.
«Мы патрабуем ад абодвух бакоў добрасумленна супрацоўнічаць, каб вырашыць праблему. Еўракамісія чакае, што газавыя патокі з Расіі ў Еўрасаюз у кірунку кожнага з зацікаўленых дзяржаў не пацерпяць і кантрактныя абавязанні будуць выкананы», — цытуе Гюнтэра Отынгера РИА «Новости».
Як раней паведамляў Тэлеграф, днём 22 чэрвеня прэзідэнт Беларусі загадаў абмежаваць транзіт газу ў Еўропу ў сувязі са скарачэннем «Газпромам» паставак «блакітнага паліва» ў Беларусь (раніцай 23 чэрвеня аб’ёмы абмежавання дасягнулі 60%).
Канфлікт паміж дзвюма краінамі разгарэўся праз назапашаную з пачатку года запазычанасць Беларусі за пастаўкі газу (каля 190 млн. даляраў) і доўг «Газпрома» за транзіт «блакітнага паліва» па беларускай тэрыторыі, які за пяць месяцаў 2010 года склаў каля 260 млн. даляраў. Абодва бакі канфлікту пакуль адмаўляюцца пагашаць запазычанасці.