Аляксандр Лукашэнка, наведваючы СВК "Язерскі" Чэрыкаўскага раёна Магілёўскай вобласці, заявіў, што краіна павінна павялічыць канкурэнтаздольнасць сельгасвытворчасці. Кіраўнік дзяржавы таксама запатрабаваў ад старшыні Магілёўскага аблвыканкама Пятра Рудніка навесці парадак на зямлі ў рэгіёне. "Вобласць павінна быць вылізана. Па контуры кожнае поле павінна быць прыведзена ў парадак. Абы-як не выйдзе", — сказаў прэзідэнт.
«Уводзьце ваенную дысцыпліну, стаўце задачы — ад сялян да кіраўнікоў выканкамаў. Вы ўмееце, ведаеце, як рабіць», — дадаў кіраўнік дзяржавы, звяртаючыся да Пятра Рудніка, паведамляе БелТА.
Па словах Аляксандра Лукашэнка, Беларусь у сферы сельгасвытворчасці павінна апярэдзіць Расію. «Расія пойдзе наперад. У іх больш рэсурсаў, у іх грошай хапае, — сказаў беларускі лідар. — Яны ідуць услед за намі, пераймаючы досвед. Мы не павінны адстаць. Мы павінны ў гэтай гонцы іх апярэдзіць на крок, на паўкрокі».
Пры гэтым кіраўнік дзяржавы падкрэсліў, што ўсе яго даручэнні, якія тычацца навядзення парадку на зямлі, рашэння пытанняў у сельскай гаспадарцы, павінны няўхільна выконвацца. Прэзідэнт таксама адзначыў, што спецыялістаў сельскай гаспадаркі неабходна зацікаўліваць у працы на зямлі.
«Ніводзін спецыяліст, ніводзін начальнік участку з гэтага года не мае права звольніцца без вашага дазволу», — звярнуўся да Пятра Рудніка Аляксандр Лукашэнка. Па словах кіраўніка краіны, на падрыхтоўку аднаго такога спецыяліста дзяржава затрачвае каля 15 тыс. даляраў, адпаведна, яны павінны акупацца.
