Беларусь "выкараскаецца" з той сітуацыі, у якую яе паставіла Расія ў пачатку 2010 года. Пра гэта заявіў прэзідэнт Беларусі Аляксандр Лукашэнка на нарадзе па пытаннях працы нафтаперапрацоўчай галіны краіны. Дадзеную галіну прэзідэнт паставіў у адзін шэраг з пытаннямі забеспячэння харчовай бяспекі дзяржавы.
«Перапрацоўка, пастаўка для ўнутраных патрэбаў і на экспарт вуглевадароднай сыравіны, забеспячэнне вуглевадароднай сыравінай нашай дзяржавы блізкае да пытання быць або не быць Беларусі як суверэннай і незалежнай дзяржаве. Таму гэта найважнейшы напрамак нашай дзейнасці, і мы з гонарам і годнасцю, як у сельскай гаспадарцы, павінны з наяўнай сітуацыі знайсці выхад. Дакладней — знайшлі», — адзначыў Аляксандр Лукашэнка на нарадзе, якая адбылася на Мазырскім НПЗ.
«Мы не збіраемся з Расіяй ваяваць па ўсіх накірунках — бяру гэта ў двукоссе. Нам не патрэбныя ніякія войны і ўскладненні. Але мы павінны зыходзіць з таго (гэта класіка), што ўсюды павінны быць альтэрнатывы, у тым ліку і ў пастаўках у краіну вуглевадароднай сыравіны», — дадаў кіраўнік дзяржавы.
Акрамя таго, падчас візіту на Мазырскі НПЗ Аляксандр Лукашэнка пацвердзіў дзяржаўныя планы па далейшых пастаўках нафты з Венесуэлы: у 2011 годзе ў аб’ёме восем — дзевяць мільёнаў тон, а ў 2012 годзе плануецца павялічыць да дзесяці мільёнаў тон.
Як даклаў прэзідэнту старшыня канцэрну «Белнафтахім» Валеры Казакевіч, беларускія нафтаперапрацоўчыя заводы ў стане перапрацаваць такі аб’ём сыравіны. У сваю чаргу дырэктар Мазырскага НПЗ Анатоль Купрыянаў паведаміў, што ў цяперашні час на прадпрыемстве праводзяць рэканструкцыю і мадэрнізацыю, што дазволіць павялічыць перапрацоўку нафты да пяці мільёнаў тон штогод і нават больш.
