Уначы з 8 на 9 сакавіка на беларускай мяжы з цягніка Кіеў-Мінск знялі ўкраінскага грамадзяніна Максіма Кіцюка, які з'яўляецца памочнікам прадстаўніка Міжнароднай назіральнай місіі Камітэту міжнароднага кантролю над сітуацыяй з правамі чалавека ў Беларусі. Памежнікі выявілі, што яго імя занесена ў базу дадзеных памежнай службы аб забароне на ўезд у краіну.
Супрацоўнікі памежнай службы накіравалі адпаведны запыт у сталіцу, атрыманы адказ пацвердзіў інфармацыю, перадае АФН. Пра прычыны ўключэння Максіма Кіцюка ў спіс неўяздных памежнікі не паведамілі.
Раніцай 9 сакавіка актывіста Міжнароднай назіральнай місіі адправілі назад ва Украіну, на білет яму паставілі штамп «дэпартаваны».
Максім Кіцюк меў намер прыбыць у Мінск, каб займацца праваабарончай дзейнасцю, адсочваць сітуацыю з захаваннем Беларуссю асноўных міжнародных абавязацельстваў у сферы забеспячэння фундаментальных правоў і свабод чалавека. Беларусь, з’яўляючыся дзяржавай-удзельніцай АБСЕ, абавязана садзейнічаць кантролю па выкананні такіх абавязацельстваў, уключаючы і праваабарончы кантроль.
