Выканаўца абавязкаў старшыні Мінгарвыканкама Мікалай Ладуцька паведаміў, што Севастопальскі парк, які знаходзіцца ў жылым раёне Зялёны Луг, вырашылі захаваць як зону адпачынку гараджан. Пра гэта стала вядома падчас сустрэчы выканаўцы абавязкаў старшыні Мінгарвыканкама з жыхарамі мікрараёна, якая прайшла 16 сакавіка напярэдадні ў гімназіі № 11.
Мікалай Ладуцька нагадаў, што ў адпаведнасці з генеральным планам па развіцці Мінска да 2030 года, парк трапляў у зону будаўніцтва трэцяга транспартнага кола. Аднак па шматлікіх просьбах жыхароў кварталаў, якія прылягаюць да парку, сталічныя ўлады прынялі рашэнне захаваць яго, паведамляюць «Минск-Новости».
«Цяпер група лепшых архітэктараў Мінскага гарадскога інстытута добраўпарадкавання і гарадскога дызайну распрацоўвае праект рэканструкцыі парку з улікам усіх пажаданняў», — паведаміў Мікалай Ладуцька.
Па словах выканаўцы абавязкаў старшыні Мінгарвыканкама, задача архітэктараў складаецца ў максімальным захаванні ўсіх зялёных насаджэнняў парку і шпацырных сцяжынак, якія сфармаваліся ў ім.
