Аляксандр Лукашэнка звярнуўся да кітайскага боку з просьбай дапамагчы ў пытаннях стабілізацыі сітуацыі на валютным рынку краіны. "Кітайскім спецыялістам была пастаўлена задача, я папрасіў іх, каб яны ацанілі сітуацыю ў краіне, выказалі сваю пазіцыю і прапанавалі шляхі выхаду з гэтай сітуацыі, а таксама каб яны ацанілі нашы шляхі выхаду з яе", — сказаў прэзідэнт Аляксандр Лукашэнка на сустрэчы з кіраўніком дэпартамента фінансавага рынку Народнага банка Кітая Се До.
«Самае галоўнае, каб яны нам з іх пункту гледжання рэкамендавалі адзін з варыянтаў далейшай стратэгіі дзеянняў на валютным рынку, у прыватнасці працы Нацыянальнага банка. Як мне далажылі, спецыялісты КНР па ўсіх гэтых пытаннях маюць адказы», — адзначыў кіраўнік дзяржавы, перадае БелТА.
«Яшчэ месяц таму ў сувязі з узнікненнем у нас праблем на спажывецкім і валютным рынку я слухаў не толькі наш урад і прадстаўнікоў Нацыянальнага банка па стабілізацыі сітуацыі, але працаваў з расійцамі, вядучымі сусветнымі банкамі, слухаў іх ацэнкі і прапановы. Самае галоўнае для мяне было, гэта больш стратэгічнае пытанне, праца з кітайскімі спецыялістамі, прадстаўнікамі Народнага банка Кітая», — сказаў кіраўнік дзяржавы.
«Тады я праз нашага сябра, пасла КНР у Беларусі, звярнуўся да свайго сябра старшыні КНР Ху Цзіньтао, да урада, кіраўніцтва Народнага банка Кітая, каб да нас прыехалі спецыялісты і распавялі пра тую сістэму кіравання фінансамі, якая склалася ў КНР», — адзначыў Аляксандр Лукашэнка.
«Мы добра ведаем, што яна не вельмі падабаецца амерыканцам, што гэта не нейкая адмысловая сістэма, але тым не менш яна вельмі эфектыўная і дае магчымасць КНР вырашаць любыя пытанні. Нас вельмі гэта цікавіла», — канстатаваў прэзідэнт Беларусі.
Лукашэнка: кітайцы самыя прыстойныя
Аляксандр Лукашэнка таксама падзякаваў кітайскіх экспертаў за праведзеную працу. Паводле яго слоў, многія яго пазіцыі супадаюць з іх меркаваннем.
Ён таксама перадаў шчырую падзяку кіраўніцтву Кітая за вельмі аператыўную рэакцыю на яго просьбу і працу прадстаўнікоў гэтай краіны ў Беларусі. «Такіх адказных прыстойных людзей у нас яшчэ не было», — сказаў Аляксандр Лукашэнка.
