26 красавіка адзначаецца 24-я гадавіна Чарнобыльскай катастрофы. Генеральны сакратар ААН Пан Гі Мун падтрымаў сумесную расійска-ўкраінска-беларускую ініцыятыву аб правядзенні ў 2011 годзе міжнароднай канферэнцыі для ацэнкі працы па вяртанні да нармальнага жыцця рэгіёнаў, пацярпелых ад аварыі на Чарнобыльскай АЭС.
Украіна, Расія і Беларусь прапанавалі правесці такі міжнародны форум у 2011 годзе, калі будзе адзначацца 25-годдзе трагедыі, перадае АФН. У выніку аварыі 26 красавіка 1986 года адбылося разбурэнне чацвертага энергаблока Чарнобыльскай атамнай электрастанцыі, размешчанай на тэрыторыі Украіны. Разбурэнне насіла выбухны характар, рэактар быў цалкам разбураны, і ў навакольнае асяроддзе была выкінута вялікая колькасць радыёактыўных рэчываў.
Аварыя расцэньваецца як найбуйная ў сваім родзе за ўсю гісторыю ядзернай энергетыкі, як па меркаванай колькасці загінулых і пацярпелых ад яе наступстваў людзей, так і па эканамічнай шкодзе.
«Мы адзначаем 24-ю гадавіну чарнобыльскай ядзернай катастрофы і ўшаноўваем памяць тых, хто загінуў і аддаем належнае мужнасці тых, хто выжыў. Мы не забудземся, што ў зону аварыі былі накіраваны сотні ліквідатараў, што больш за 330 тыс. чалавек былі змушаны назаўжды пакінуць свае дамы і, што пасля тысячы дзяцей захварэлі ракам шчытападобнай залозы. Мы аддаем належнае гераічным намаганням людзей, якія займаліся ачысткай аварыйнага аб’екта, і адвазе мільёнаў людзей у навакольных раёнах, якія больш за два дзесяцігоддзі жылі пад прыгнётам страху за ўласнае здароўе і адсутнасці ўпэўненасці ў будучыні», — гаворыцца ў традыцыйным штогадовым пасланні генеральнага сакратара ААН, апублікаваным напярэдадні 24-й гадавіны чарнобыльскай катастрофы.
Памінальные службы па ахвярах трагедыі 26 красавіка пройдуць ва ўсіх храмах Беларусі. Мітрапаліт Мінскі і Слуцкі Філарэт будзе маліцца разам з вернікамі ў праваслаўным храме ў гонар Абраза Божай Маці «Узысканне загінулых». У мінскім Парку Сяброўства народаў урачыста ўскладуць кветкі да Каменя памяці ахвяраў і герояў Чарнобыльскай катастрофы. Апазіцыя правядзе традыцыйную акцыю «Чарнобыльскі шлях».
