Цэнтравыбаркам Беларусі лічыць шостага лютага 2011 года спрыяльнай датай для правядзення ў краіне прэзідэнцкіх выбараў, паведаміла старшыня ЦВК Лідзія Ярмошына. "Мы зыходзім з таго, што гэта канчатковая дата для правядзення прэзідэнцкіх выбараў, якая з'яўляецца спрыяльнай", — сказала кіраўніца ЦВК, адказваючы на пытанне журналістаў, ці будзе Цэнтравыбаркам рэкамендаваць найбольш прымальную дату прэзідэнцкіх выбараў.
Лідзія Ярмошына дадала, што пакуль у Цэнтравыбаркаме не абмяркоўвалася канкрэтная дата правядзення выбараў прэзідэнта Беларусі, і ў цэлым гэтае пытанне — палітычнае. «Са свайго боку Цэнтравыбаркам будзе сачыць толькі за тым, каб паміж датай заканчэння паўнамоцтваў і прызначэннем кампаніі па выбарах прэзідэнта было не менш за тры месяцы», — сказала старшыня Цэнтравыбаркаму, перадае БелТА.
Кіраўнік ЦВК адзначыла, што Цэнтравыбаркам не мае намеру ініцыяваць новыя папраўкі ў выбарчае заканадаўства да правядзення прэзідэнцкіх выбараў. «Частыя змены выбарчага заканадаўства значна часцей вядуць да беззаконня, чым, наадварот, працуюць на выкананне працэсу выбараў», — лічыць Лідзія Ярмошына.
У якасці прыкладу кіраўнік Цэнтравыбаркаму прывяла цяперашнюю кампанію па выбарах дэпутатаў мясцовых саветаў, якая праходзіла па новых правілах. «Многія ва ўчастковых камісіях не ведалі аб тым, што кандыдат мае права прысутнічаць пры падліку галасоў, — адзначыла Лідзія Ярмошына. — Акрамя таго, многія члены выбарчых камісій, якія даўно ўдзельнічаюць у выбарчых кампаніях, пачуваюцца занадта ўпэўнена, у іх з’яўляецца залішняя ганарлівасць, яны многае выконваюць па-старому і не так старанна вывучаюць новаўвядзенні ў выбарчым заканадаўстве».
Ярмошына: Еўрапейскаму электарату «яшчэ расці і расці да нашага ўзроўню»
Таксама Старшыня Цэнтравыбаркаму на прэс-канферэнцыі, прысвечанай правядзенню выбараў у мясцовыя саветы, растлумачыла вялікую разбежку ў выніках датэрміновага і асноўнага галасавання па некаторых акругах. Лідзія Ярмошына лічыць, што гэта абумоўлена агітацыяй апазіцыйных кандыдатаў за галасаванне менавіта ў прызначаны для выбараў дзень.
«Гэта ўсё суб’ектыўна. Мы вынікаў выбараў пакуль з вамі не бачылі. Інфармацыяй валодаем толькі са словаў. Ні пацвердзіць, ні аспрэчыць яе немагчыма. Аднак калі вынікі датэрміновага галасавання насамрэч адрозніваюцца ад вынікаў асноўнага, то магу гэта растлумачыць агітацыйнымі мерапрыемствамі саміх апазіцыйных кандыдатаў. Іх прыхільнікі традыцыйна прыходзяць галасаваць у дзень выбараў. Таму я дапушчаю, што магчымая такая разбежка ў выніках», — адзначыла Лідзія Ярмошына, паведамляе «n#####n».
Кіраўнік Цэнтравыбаркаму таксама пракаментавала вялікі, у параўнанні з большасцю еўрапейскіх краін, адсотак яўкі выбаршчыкаў. «Еўрапейскаму электарату яшчэ расці і расці да нашага ўзроўню», — заявіла Лідзія Ярмошына, дадаўшы, што канчатковыя вынікі выбараў у мясцовыя Саветы дэпутатаў стануць вядомыя ў пятніцу — 30 красавіка.
Ярмошына: на дзесяці ўчастках у краіне адбудуцца паўторныя выбары
Кіраўнік Цэнтравыбаркаму праінфармавала на прэс-канферэнцыі аб тым, што паўторныя выбары ў мясцовыя Саветы дэпутатаў пройдуць у Беларусі на дзесяці ўчастках. Па дадзеных ЦВК, падчас галасавання былі абраны 21 293 дэпутаты мясцовых саветаў. «На дзевяці ўчастках дэпутаты не абраны, бо атрымалі менш за палову галасоў выбаршчыкаў, на адным участку выбары не праводзіліся ў сувязі са смерцю кандыдата», — адзначыла Лідзія Ярмошына.
Па словах старшыні Цэнтравыбаркаму, нягледзячы на гэта, усе 1 495 мясцовых Саветаў дэпутатаў абраны «ў правамоцным складзе і на працягу месяца павінны правесці ўстановачныя сесіі, сфармаваць працоўныя органы».
