Восьмага траўня ў ГСАК "Лагойск" пройдзе фэст "Парад феерверкаў". У яго рамках гледачы змогуць убачыць выступы вядучых піратэхнічных каманд Расіі, Украіны і Беларусі, а таксама ваенна-гістарычнае шоу трох эпохаў — Вялікага княства Літоўскага, Напалеонаўскіх войнаў і Вялікай Айчыннай.
Адраджэнне мастацтва салютаў і феерверкаў на тэрыторыі СССР было наўпрост звязана з Вялікай Айчыннай вайной. У 1943 годзе ўпершыню салютам над Чырвонай плошчай было адзначана вызваленне Белгарада і Арла ў рамках знакамітай Курскай бітвы — 12 залпаў з 124 гарматаў. З тых часоў яны суправаджалі кожную буйную перамогу той страшнай вайны, а кульмінацыяй стаў салют у гонар перамогі над Германіяй 9 траўня 1945 года — 30 залпаў з 1000 гарматаў. Пасля гэтага салют стаў неад’емным атрыбутам свята Перамогі.
Сёння мастацтва піратэхнікі сягнула далёка наперад, так што на «Парадзе феерверкаў» гледачоў чакаюць не проста размераныя залпы батарэяў, а сапраўдныя вогненныя спектаклі ў небе ў суправаджэнні музыкі. Сімвалічна, што пад Мінскам шоў у гонар 65-годдзя перамогі наладзяць лепшыя піратэхнікі трох славянскіх рэспубалік былога СССР — Расіі (EZ-Studio, Масква), Украіны («Эдэльвейс-феерверкі», Данецк) і Беларусі («Кальвін», Мінск), чые дзяды поруч ваявалі на франтах той вайны.
Таксама ў рамках фэсту можна будзе ўбачыць рэканструкцыю ваенных дзеянняў трох эпохаў. Гледачоў чакаюць паядынкі рыцараў часоў Вялікага княства Літоўскага, бітвы паміж рускімі і французскімі войскамі часоў Напалеона і баі паміж нямецкімі і савецкімі часткамі часоў Вялікай Айчыннай. Прычым, акрамя непасрэдна батальных сцэн, наведнікі змогуць пазнаёміцца з узбраеннем, амуніцыяй і побытам салдатаў розных часоў.
Квіток на фэст каштуе 30 тыс. рублёў. Уваход для дзяцей да 12 гадоў у суправаджэнні бацькоў, а таксама для курсантаў ваенных вучэльняў у форме — бясплатны. Да пляцоўкі фэсту можна дабрацца на асабістым транспарце (бясплатная паркоўка на тысячу машын) і на адмысловым бясплатным аўтобусе, які будзе курсіраваць ад Нацыянальнай Бібліятэкі. Пачатак праграмы а 17:00. Даведкі і заказ квіткоў: (029) 171 179 8.
