Некаторыя адвакаты затрыманых 19 снежня асобы дапускаюць грубыя парушэнні правілаў прафесійнай этыкі адваката, дзейнага заканадаўства, у тым ліку закона Беларусі «Аб адвакатуры». З такой заявай выступіла 29 снежня міністэрства юстыцыі Беларусі.
«Асобныя адвакаты, якія ажыццяўляюць абарону асобаў, што ўдзельнічалі 19-20 снежня 2010 года ў здзяйсненні дзеянняў, накіраваных на арганізацыю масавых беспарадкаў, якія суправаджаліся спробай захопу дзяржаўных устаноў, знішчэннем маёмасці, узброеным супрацівам прадстаўнікам улады, дапускаюць грубыя парушэнні Правілаў прафесійнай этыкі адваката, дзейнага заканадаўства, у тым ліку Закона Рэспублікі Беларусь «Аб адвакатуры», — гаворыцца ў заяве Мінюста.
Міністэрства паказвае на тое, што адвакаты, «злоўжываючы сваім правам на абарону іншых асоб, у скажоным святле падаюць інфармацыю аб ходзе следства і магчымасці рэалізацыі правоў сваіх падабаронных на юрыдычную дапамогу, стане іх здароўя і ўмовах утрымання, тэндэнцыйна падаюць інфармацыю аб рабоце праваахоўных органаў краіны «.
«Міністэрства юстыцыі, як ліцэнзуючы орган у галіне адвакацкай дзейнасці, ўнесла прадстаўленне кіраўніцтву Мінскай гарадской калегіі адвакатаў, у якім ўказала на нізкі прафесійны ўзровень асобных адвакатаў, парушэнні Правілаў прафесійнай этыкі і заканадаўства і запатрабавала прыняць неадкладныя меры да іх безумоўнага выканання», — паведамілі ў ведамстве.
Па выяўленых фактах міністэрствам юстыцыі праводзіцца праверка, патрабуюцца тлумачэнні і па выніках будуць прыняты прадугледжаныя заканадаўствам меры рэагавання, распавялі ў мінюсце.
