Беларусь, Казахстан, Расія, якія ўваходзяць у Мытны саюз, уступілі ў перамовы па стварэнні зоны свабоднага гандлю з Новай Зеландыяй. З такой заявай 15 лістапада выступілі кіраўнікі МЗС Беларусі Сяргей Мартынаў, мінэканамразвіцця Расіі Эльвіра Набіуліна, мінэканамразвіцця і гандлю Казахстана Жанар Айтжанава і міністр гандлю Новай Зеландыі Цім Гросер.
Як стала вядома карэспандэнту Тэлеграфа, міністры ўхвалілі падрыхтаваны 5 кастрычніка 2010 года экспертамі чатырох краін Сумесны даклад аб зоне свабоднага гандлю і даручылі сваім прадстаўнікам пачаць перамовы з мэтай заключыць пагадненне да канца 2011 года.
«Будучае пагадненне аб свабодным гандлі мае асаблівае значэнне, паколькі яно зробіць новы важны ўклад у дынамічнае і хуткае развіццё архітэктуры азіяцка-ціхаакіянскага эканамічнага супрацоўніцтва шляхам уключэння нашых дзяржаў у працэсы эканамічнай інтэграцыі ў гэтым рэгіёне», — паведамілі ў МЗС Беларусі.
Беларусь, Казахстан і Расія як члены Мытнага саюза ўпершыню ўступілі ў перамоўны працэс па стварэнні зоны свабоднага гандлю з замежным партнёрам, што з’яўляецца важным крокам у развіцці Мытнага саюза і яго інтэграцыі ў сістэму міжнародных гандлёва-эканамічных адносін, адзначылі ў беларускім МЗС.
