Упраўленне Дэпартаменту фінансавых расследаванняў Камітэту дзяржаўнага кантролю па Мінскай вобласці і Мінску ўзбудзіла крымінальную справу ў дачыненні да двух мінчукоў (родных братоў), якія незаконна ўвозілі аўтамабілі з Германіі ў Беларусь. Незаконнай прадпрымальніцкай дзейнасцю мужчыны займаліся з 2006 года.
У ходзе праведзенай праверкі праваахоўныя органы высветлілі, што толькі ў 2007 годзе родныя браты перагналі з Германіі ў Беларусь і прадалі тут не менш за дзесяць аўтамабіляў замежнай вытворчасці. Каб схаваць свае супрацьпраўныя дзеянні, злачынцы афармлялі машыны, як увезеныя сваякамі і знаёмымі. У выніку незаконнай прадпрымальніцкай дзейнасці мужчыны атрымалі прыбытак на суму звыш 250 млн. рублёў.
Следчымі фінансавай міліцыі ўжо распачата крымінальную справа па частцы 2 артыкулу 233 КК Беларусі (незаконная прадпрымальніцкая дзейнасць, спалучаная з атрыманнем прыбытку ў асабліва буйным памеры), паведамілі ў КДК.
Расследаванне яшчэ адной крымінальнай справы ў дачыненні да трох сваякоў (двух братоў і іх бацькі), звязанага з незаконным увозам аўто ў Беларусь, ужо завершана, і яго матэрыялы перададзеныя ў суд. Як высветлілі праваахоўныя органы, на працягу 2006 — 2008 гадоў мужчыны завезлі ў Беларусь 60 аўтамабіляў на суму больш за мільярд рублёў. «Шэрыя» аўто пасля выплаты мытных плацяжоў мужчыны прадавалі прыватным асобам на аўтамабільных рынках Мінску, праз аб’явы ў сеціве і ў спецыялізаваных друкаваных выданнях.
Акрамя таго, у дачыненні да гэтых грамадзян распачалі яшчэ адну крымінальную справу па артыкуле «махлярства». Мужчын падазраюць у тым, што яны падманным шляхам завалодалі чатырма аўтамабілямі, якія былі ім перададзеныя на адказнае захоўванне. Пасля злачынцы прадалі аўтамабілі, прычыніўшы пацярпелым шкоду на суму 68 млн. рублёў.
