Нацбанк: павышаны попыт на валюту спадзе ў найбліжэйшыя дні
Начальнік упраўлення інфармацыі Нацыянальнага банка Беларусі Анатоль Драздоў 14 сакавіка ў чарговы раз абверг чуткі аб планаванай дэвальвацыі рубля і падкрэсліў, што “неабходнасці тэрмінова бегчы па валюту няма”. Паводле яго слоў, у Нацбанку чакаюць, што павышаны попыт насельніцтва на валюту, які назіраецца ў апошні час, сыдзе ў бліжэйшыя дні.
“Такія чуткі (пра будучую дэвальвацыю - Тэлеграф) распаўсюджваліся напярэдадні святочных дзён да 8 сакавіка, а 9 сакавіка ўсе пераканаліся, што гэта - поўнае глупства. Ізноў чуткі сталі распаўсюджвацца ў пятніцу. Нацбанк усё гэта аспрэчыў, але тым не менш у нас ёсць грамадзяне, якія больш вераць інтэрнэту”, - цытуе Анатоля Драздова БелаПАН.
Прэс-сакратар Нацбанка падкрэсліў, што банкі краіны павінны быць пастаянна гатовыя да падвышанага попыту на замежную валюту.
Між тым, у Мінску купіць даляры апошні час досыць праблематычна. Так, днём 14 сакавіка ў абменным пункце “Беларусбанка” на вуліцы Кірава ў чэргі на куплю валюты выстраілася каля 150 чалавек. У шэрагу абменных пунктаў даляраў папросту не было ў наяўнасці, перадае “Еўрапейскае радыё для Беларусі”.
Анатоль Драздоў патлумачыў, што дэвальвацыі рубля не плануецца, бо рубель прывязаны да кошыка валют, а калідор ваганняў курсу ў адносінах да кошыка валют на 2011 год устаноўлены ў межах +/- 8%.
“Толькі ў межах гэтага калідора мы можам ўсталёўваць курс. Мы працуем па паказчыках. Ёсць дакумент “Асноўныя напрамкі грашова-крэдытнай палітыкі РБ”. Яны прымаюцца кожны год. Звычайна восенню. Асноўныя напрамкі мы ўзгадняем з урадам, пасля чаго аддаем на подпіс прэзідэнту. Прэзідэнт зацвярджае. Асноўныя напрамкі прапісаны ўсюды - у Канстытуцыі, у банкаўскім кодэксе. Пасля зацвярджэння яны становяцца законам. Мы не можам іх парушыць. Пакуль прэзідэнт не зацвердзіць новыя параметры. Зразумела, прэзідэнт нічога не сцвярджаў і не збіраецца гэтага рабіць, таму што няма для гэтага ніякіх падставаў. Таму гэтыя +/-8% - для нас закон”, - заявіў Анатоль Драздоў.
Акрамя таго, як раней перадаваў Тэлеграф, у лютым гэтага года намеснік кіраўніка праўлення Нацбанка Беларусі Тарас Надольны заявіў, што доступ жыхароў краіны да замежнай валюты задавальняецца і “заўсёды будзе вольным, каб паказаць, што беларускі рубель - надзейная і прагназаваная валюта”.