МЗС: санкцыі ЗША супраць Беларусі абсалютна бесперспектыўныя
Беларусь лічыць рашэнне ўрада ЗША ўвесці эканамічныя санкцыі супраць Беларусі “неабгрунтаваным і неправамерным крокам”. “Гэта рашэнне вяртае ў двухбаковыя адносіны фактар напружанасці і недаверу”, - адзначылі 1 лютага ў МЗС Беларусі. Акрамя таго, беларускі бок пакінула за сабой права зрабіць “крокі ў адказ прапарцыйнага характару”.
У міністэрстве замежных спраў растлумачылі, што рашэнне амерыканскіх уладаў аб увядзенні эканамічных санкцый парушае абавязацельства ЗША не ўжываць у дачыненні да Беларусі меры эканамічнага прымусу, абумоўленыя дзейным Будапешцкім мемарандумам 1994 года.
“Метады ціску і прымусу з’яўляюцца абсалютна бесперспектыўнымі”, - лічаць у знешнепалітычным ведамстве Беларусі. Акрамя таго, у афіцыйнай заяве МЗС адзначаецца, што беларускі бок зацікаўлены ў падтрыманні канструктыўных адносін з амерыканскімі партнёрамі, якія адпавядаюць інтарэсам абедзвюх краін.
Як раней перадаваў Тэлеграф, 31 студзеня дзярждэпартамент ЗША абвясціў аб увядзенні аднабаковых санкцыі ў дачыненні да шэрагу беларускіх кампаній. Так, ЗША анулявалі дакумент, які дазваляе амерыканскім грамадзянам здзяйсняць угоды з ААТ “Лакафарба” і ААТ “Полацк Шкловалакно”, даччынымі кампаніямі дзяржаўнага нафтахімічнага канцэрна “Белнафтахім”. Акрамя таго, ЗША таксама пашырылі спіс грамадзян Беларусі, якім забаронены ўезд на тэрыторыю краіны, а таксама рыхтуюцца ўвесці фінансавыя санкцыі ў дачыненні да шэрагу беларускіх грамадзян.
У дзярждэпартаменце растлумачылі, што санкцыі будуць заставацца ў сіле да таго часу, пакуль беларускія ўлады не вызваляць усіх палітычных зняволеных і прадстаўнікоў апазіцыі і не здымуць з іх абвінавачанні.