Міністэрства аховы здароўя хоча забараніць продаж алкаголю асобам да 21 года

09.07.2010 15:15
Архив Редакция

Міністэрства аховы здароўя Беларусі лічыць мэтазгодным ўвесці забарону на продаж алкаголю асобам да 21 года. Пра гэта расказаў галоўны нарколаг Міністэрства аховы здароўя Аляксей Аляксандраў. "Мы выступаем з ініцыятывай павысіць узрост, калі можна купляць алкаголь, да 21 года, — сказаў прадстаўнік ведамства. — Праект гэтага дакументу цяпер знаходзіцца на разглядзе і, я думаю, будзе прыняты".

Па словах галоўнага нарколага Міністэрства аховы здароўя, ведамства таксама ініцыюе ўстанаўленне абмежавання або забароны на рэкламу піва і слабаалкагольных напояў. «Мы лічым, што, калі нават такая рэклама не будзе забароненай цалкам, але максімальна абмежаванай, гэта ўжо дасць станоўчы эфект», — цытуе Аляксея Аляксандрава БелТА.

Пры гэтым прадстаўнік міністэрства адзначыў, што больш за палову рэкламнага часу ў вячэрнім эфіры займае рэклама піва і слабаалкагольных напояў. «Але ж у гэты час тэлевізар глядзяць і дзеці. Аналіз дадзеных навуковых даследаванняў паказаў, што ранняя алкагалізацыі дзяцей і моладзі наўпрост звязана з рэкламай у СМІ алкагольнай прадукцыі, перш за ўсё піва. Досвед жа шэрагу краінаў паказвае, што забарона або абмежаванне падобнай рэкламы станоўча адбіваецца на здароўі маладога пакалення», — канстатаваў Аляксей Аляксандраў.

«У барацьбе з алкагалізмам, у яго прафілактыцы вельмі важна ўзаемадзеянне самых розных структураў. Толькі дзякуючы такому супрацоўніцтву можна дамагчыся станоўчых вынікаў», — упэўнены прадстаўнік Міністэрства аховы здароўя.

Па словах галоўнага нарколага, ужо распрацавана канцэпцыя дзяржпраграмы па зніжэнні ўзроўню алкагалізацыі насельніцтва і пераадоленні яе негатыўных наступстваў для грамадства. Як паведаміў Аляксей Аляксандраў, дадзеную канцэпцыю ўжо ўнеслі на разгляд ва ўрад. «Думаю, што ў найбліжэйшы час яна будзе прынята, і мы пачнем распрацоўку праграмы», — падсумаваў Аляксей Аляксандраў.

Как вам новость?