Беларусь заўсёды адкрытая для назіральнікаў ад Арганізацыі па бяспецы і супрацоўніцтве ў Еўропе. Пра гэта 15 лістапада на прэс-канферэнцыі ў Маскве заявіў генеральны сакратар АБСЕ Марк Пэрэн дэ Брышамбо, адказваючы на пытанне аб сітуацыі вакол будучых выбараў прэзідэнта краіны. Паводле яго слоў, у Беларусі ні разу не праводзіліся выбары, у якіх удзельнічала б менш за 400 назіральнікаў.
Марк Пэрэн дэ Брышамбо адзначыў, што афіцыйнае запрашэнне даслаць назіральніцкую місію за подпісам кіраўніка МЗС Беларусі Сяргея Мартынава паступіла ў АБСЕ на наступны дзень пасля афіцыйнага абвяшчэння даты выбараў прэзідэнта Беларусі, перадае ІА «REGNUM-Belarus».
Між тым, таксама 15 лістапада місія доўгатэрміновых назіральнікаў АБСЕ атрымала пакет неабходных дакументаў для працы ў Беларусі. Дакументы кіраўніку місіі назіральнікаў АБСЕ амбасадару Герту Арэнсу ўручыла старшыня Цэнтральнай камісіі па выбарах і правядзенні рэспубліканскіх рэферэндумаў Лідзія Ярмошына, перадае БелТА.
Як раней паведамляў Тэлеграф, 12 лістапада ў Мінск прыбыла асноўная група місіі міжнародных назіральнікаў АБСЕ. У склад місіі увайшло 13 чалавек, а ўзначаліў яе ўжо ў трэці раз пасол Герт Арэнс.
