Прыбыццё чарговага, ужо чацвертага па ліку танкера з венесуэльскай нафтай маркі «Санта-Барбара» для Беларусі чакаюць у адэскім порце 17 ліпеня. Пра гэта расказалі ў дыспетчарскай нафтагазавага тэрмінала марскога порта.
Разам з тым, цяпер працягваецца адгрузка з ёмістасцяў нафтагазавага тэрмінала порта Адэсы ў чыгуначныя цыстэрны каля 30 тыс. тон венесуэльскай нафты для Беларусі, якую папярэдні танкер даставіў яшчэ ў канцы чэрвеня, перадае БелТА. Больш за 35 тыс. тон нафты надоечы ўжо адправілі па чыгунцы на Мазырскі НПЗ для далейшай перапрацоўкі.
Акрамя таго, чакаецца, што, 12 ліпеня, у Кіеве па выніках сустрэчы першых віцэ-прэм’ераў Беларусі і Украіны Уладзіміра Сямашкі і Андрэя Клюева будзе падпісана міжурадавае пагадненне аб узаемавыгадным двухбаковым супрацоўніцтве Беларусі і Украіны ў сферы транспарціроўкі нафты.
Як ужо перадаваў Тэлеграф, дзявятага ліпеня Беларусь і Украіна адклалі падпісанне міжурадавага пагаднення аб транспарціроўцы венесуэльскай нафты праз украінскую тэрыторыю на беларускія НПЗ.
Мяркуецца, што дадзенае міжурадавае пагадненне дазволіць павялічыць аб’ёмы транспарціроўкі нафты па тэрыторыі Украіны трубаправодным і чыгуначным транспартам.